မတ်လ ၂၀ ရက်နေ့တွင် ပြုလုပ်သော ပြည်သူ့လွှတ်တော် အစည်းအဝေးတွင် မြန်မာနိုင်ငံမှ ပြည်ပနိုင်ငံများသို့ ပေးဆပ်ရန် ကျန်ရှိသည့် ချေးငွေ ပမာဏကို သိရှိလိုသည့် မယ်စဲ့ မဲဆန္ဒနယ် ပြည်သူ့လွှတ်တော် ကိုယ်စားလှယ် ဦးကျော်ခိုင်ဝင်း၏ မေးခွန်းနှင့် ပတ်သက်ပြီး ၎င်းက အထက်ပါအတိုင်း ပြောကြားလိုက်ခြင်း ဖြစ်သည်။
မြန်မာနိုင်ငံက ချေးငွေ ယူထားသော ပြည်ပနိုင်ငံ အဖွဲ့အစည်း ၁၆ ခုသို့ ပေးဆပ်ရန် ကျန်ရှိငွေ ပမာဏ အမေရိကန်ဒေါ်လာ ၉၅၈၄ ဒသမ ၈၉၄ သန်းရှိပြီး ၂၀၁၃ ခုနှစ်၊ ဒီဇင်ဘာလ ၃၁ ရက်နေ့ အထိ ချေးယူထားငွေများ ဖြစ်ကြောင်း ဒေါက်တာ လင်းအောင်က ပြောကြားသည်။
အဆိုပါ ချေးငွေများမှာ အပြည်ပြည်ဆိုင်ရာ ငွေကြေး ရန်ပုံငွေအဖွဲ့ IMF ၏ ငွေလဲလှယ်နှုန်းအရ တွက်ချက်ထားသော ပမာဏ ဖြစ်ပြီး ချေးငွေလက်ကျန် ပမာဏသည် အချိန်နှင့်အမျှ ဖြစ်ပေါ်နေသော ငွေလဲနှုန်း ပြောင်းလဲမှု၊ စာရင်းပိတ်နေ့တွင် ပြည်ပချေးငွေ ထုတ်ယူသုံးစွဲခြင်းနှင့် အရင်းအတိုး ပြန်လည် ပေးဆပ်ခြင်းတို့ကြောင့် ကိန်းဂဏန်း ပြောင်းလဲမှု ရှိနိုင်ကြောင်း ၎င်းကဆိုသည်။
ယင်းသို့ ချေးငွေ ပမာဏကို ထုတ်ပြန်ပေးသော်လည်း မည်သည့် အချိန်က စတင် ချေးယူခဲ့ကြောင်းကိုမှု ထည့်သွင်း ပြောဆိုသွားခြင်း မရှိပေ။
ချေးငွေများကို ပွင့်လင်းမြင်သာမှု အားနည်းစွာ ချေးယူခဲ့သော်လည်း အစိုးရသစ် လက်ထက်တွင် လွှတ်တော် သဘောထား ရယူပြီးမှသာ ချေးယူရခြင်း ဖြစ်ပြီး အသုံးချသည့် လုပ်ငန်းများကိုသာ စိစစ်ရန် အရေးကြီးကြောင်း အမျိုးသားလွှတ်တော် ကိုယ်စားလှယ် ဦးဖုန်မြင့်အောင်က ပြောကြားသည်။
“ချေးတဲ့သူကတော့ သူ့အတွက် အကျိုးအမြတ် ဘာရလဲ ကြည့်ပြီးမှ ချေးမှာပါ၊ အရင်အစိုးရ လက်ထက်က ချေးခဲ့တာဆိုလည်း အမွေပေးခဲ့တာလို့ပဲ သဘောထားရမှာပါ” ဟု ၎င်းကဆိုသည်။
ပေးဆပ်ရန် ကျန်ရှိ နိုင်ငံများ၊ ငွေကြေး အဖွဲ့အစည်း များနှင့် နိုင်ငံတစ်ခုချင်း ပေးဆပ်ရန် ကျန်ငွေ ပမာဏများမှာ IDA မှ ၈၆၂ ဒသမ ၅၅၈ သန်း၊ ADB မှ ၆၁၃ ဒသမ ၀၅၁ သန်း၊ OPEC မှ ၁၈ ဒသမ ၁၃၁ သန်း၊ အိန္ဒိယနိုင်ငံမှ ၁၉၃ ဒသမ ၈၅၄ သန်း၊ ကိုးရီးယားနိုင်ငံမှ ၄၈ ဒသမ၂၁၁ သန်းနှင့် ဂျပန်နိုင်ငံမှ ၁၉၂၇ ဒသမ ၉၆၃ သန်း ရှိကြောင်း ဘဏ္ဍာရေး ဝန်ကြီးဋ္ဌာနမှ သိရသည်။
ထို့အပြင် ထိုင်းနိုင်ငံမှ ၅၁ ဒသမ ၅၂၅ သန်း၊ မလေးရှားနိုင်ငံမှ ၉၀ သန်း၊ ဆာဗီးယား နိုင်ငံမှ ၁၁ ဒသမ ၄၁၃ သန်း၊ ဂျာမနီနိုင်ငံမှ ၉၂၃ ဒသမ ၅၉၆ သန်း၊ ဖင်လန်နိုင်ငံမှ ၃ ဒသမ ၄၄၇ သန်း၊ ပြင်သစ်နိုင်ငံမှ ၆၀၀ ဒသမ ၅၉၈ သန်း၊ နယ်သာလန်နိုင်ငံမှ ၁၀ ဒသမ ၈၈၄ သန်း၊ သြစတြေးယား နိုင်ငံမှ ၁၅၅ ဒသမ ၃၄၆ သန်း၊ အင်္ဂလန်နိုင်ငံမှ ၄၄ ဒသမ ၂၃၈ သန်း၊ ကနေဒါနိုင်ငံမှ ၅ ဒသမ ၁၈၆ သန်း၊ အီတလီနိုင်ငံမှ ၃ ဒသမ ၁၇၀ သန်း၊ ဆော်ဒီအားရေဗျနိုင်ငံမှ ၂ ဒသမ ၅၃၀ သန်း ပြန်လည် ပေးဆပ်ရန် ကျန်ရှိကြောင်း ဘဏ္ဍာရေး ဝန်ကြီးဌာနမှ သိရသည်။
No comments:
Post a Comment