အဆိုပါ နိုင်ငံခြားသူ နှစ်ဦးသည် ပုဂံ-ညောင်ဦးမှ မတ်လ ၅ ရက်နေ့ ည ၇ နာရီ အချိန်တွင် မန္တလေးသို့ ရောက်ရှိလာပြီး ည ၈ နာရီအချိန် ကျုံးဘေးသို့ စက်ဘီးစီးရာမှ ဆိုင်ကယ်ဖြင့် စကားပြော နှုတ်ဆက်ဟန်ဆောင်ပြီး စက်ဘီးရှေ့ခြင်းအတွင်း ထားရှိသော ကျောပိုးအိတ်ကို လုယူ ထွက်ပြေးခံခဲ့ရခြင်း ဖြစ်ကြောင်း အဆိုပါ ရဲတပ်ဖွဲ့မှူးရုံးမှ တာဝန်ရှိသူတစ်ဦးက ပြောကြားသည်။
လုယူ ထွက်ပြေးသွားသော ကျောပိုးအိတ်ထဲတွင် မြန်မာငွေ ကျပ် ၅၀,၀၀၀၊ နိုင်ငံကူး လက်မှတ်တစ်ခု၊ iPhone 5S ရွှေရောင် ဟန်းဆက်တစ်လုံး၊ Panosonic အမျိုးအစား ကင်မရာတစ်လုံးနှင့် ပန်းရောင် ပိုက်ဆံအိတ် အသေးတစ်လုံး စုစုပေါင်းတန်ဖိုး ၁၁ သိန်းကျပ်ခန့်တို့ ပါသွားကြောင်း တိုင်းရဲတပ်ဖွဲ့မှူး ရုံးမှတ်တမ်းအရ သိရသည်။
“ကျွန်တော်တို့ အနေနဲ့ စက်ဘီး ရှေ့ခြင်းထဲကို ကျောပိုးအိတ်တွေ ဘာတွေ ထည့်သွားရင်တော့ စက်ဘီးလက်ကိုင်မှာ ချည်ထားဖို့ တွေ့ရင် သတိပေးတယ်။ ပြည်သူလူထု အနေနဲ့ ပူးပေါင်း ဆောင်ရွက်စေချင်ပါတယ်” ဟု ကမ္ဘာလှည့် ခရီးသွားလုပ်ငန်းနှင့် လုံခြုံရေး ရဲတပ်ဖွဲ့ (မန္တလေး) တပ်ဖွဲ့စုမှူး ရဲမှူးမောင်မောင်အေးက The Voice သို့ ပြောကြားသည်။
နိုင်ငံခြားသားများ စက်ဘီးစီးနင်းနေစဉ် လုယက်ခံရမှုများ လျော့ကျလာစေရန်အတွက် ပုဂံ-ညောင်ဦးတွင် စက်ဘီး အငှားဆိုင်များကို စက်ဘီးရှေ့ခြင်း ဖြုတ်ထားရန် သတိပေးထားကြောင်း မြန်မာနိုင်ငံ ဧည့်လမ်းညွှန်အသင်း ဥက္ကဋ္ဌ ဦးဇော်ဝင်းချိုက ပြောကြားသည်။
မန္တလေးခရိုင် အတွင်းတွင် နိုင်ငံခြားသား ခရီးသွားများကို အကူအညီ ပေးနိုင်ရေးအတွက် ကမ္ဘာလှည့် ခရီးသွားလုပ်ငန်းနှင့် လုံခြုံရေး ရဲတပ်ဖွဲ့ Tourism Police အင်အား ၅၀ ခန့် ရှိကြောင်း ရဲမှူးမောင်မောင်အေးက ထပ်မံပြောကြားသည်။
အဆိုပါ ကျောပိုးအိတ် လုယူ ထွက်ပြေးသွားသူကို စုံစမ်းဆောင်ရွက်လျက် ရှိပြီး ချမ်းအေးသာစံ မြို့မရဲတပ်ဖွဲ့စခန်းတွင် (ပ) ၁၉၈/၂၀၁၄ ပြစ်မှုပုဒ်မ ၃၈၂ အရ အမှုဖွင့်ထားကြောင်း မှတ်တမ်းများအရ သိရသည်။
The Voice Weekly
No comments:
Post a Comment