ဇာတ်ကားတွေ ဆက်တိုက် ရိုက်ကူးသွားတော့မယ့် ခင်ဝင့်ဝါ

Miss တစ်ယောက် အနေနဲ့ အနုပညာ နယ်ပယ်ထဲ ဝင်ရောက်လာခဲ့သူ ခင်ဝင့်ဝါ ကအခုဆိုရင် ကြော်ငြာ၊ ဗီဒီယို ဇာတ်ကားတွေမှာ ပါဝင် သရုပ်ဆောင် လာတာ တွေ့ရ ပါတယ်။ အခုလည်း ဒါရိုက်တာ ဆုသြချယ် ရိုက်ကူးတဲ့ အကျယ်ချုပ် ဗီဒီယိုဇာတ်ကားမှာ ခင်ဝင့်ဝါက ထိုက်စံမော့စ် နဲ့ အတူ ပါဝင်သရုပ်ဆောင် ထားပါတယ်။

အဲဒီ ဇာတ်ကား နဲ့ပတ်သက်ပြီး “ဒီကားမှာ ညီမက ရန်ကုန် ကို လာလည်တာပေါ့နော်။ မင်းသား ထိုက်စံရဲ့ မိဘအိမ် မှာနေပြီးတော့ ကျောင်းတက်ရမယ်။ ထိုက်စံရဲ့အမေ က ထိုက်စံကို ငယ်ငယ်လေး ကတည်းက ဆင်းဆင်းရဲရဲနဲ့ ပညာသင် ၊ကျောင်းထား ပေးတာပေါ့ နော် ။နောက်ပိုင်း သူနဲ့ မေတ္တာ မျှသွားတယ်။ မိဘက သဘောမတူ ဘူး။ ဒါပေမဲ့ နောက်ပိုင်း သဘောတူသွားတဲ့ ရိုမန့်ဆန်ဆန် ဇာတ်ကားလေးပါ” လို့ ပြောပြပြီး သူနဲ့ လိုက်ဖက်မယ့် ဇာတ်လမ်း မျိုးဆိုရင် ဆက်တိုက်လက်ခံ ရိုက်ကူး သွားမှာ ပါလို့ပြောတဲ့ ခင်ဝင့်ဝါက “လိုက်ဖက်မယ် ထင်ရင် ရိုက်ဖြစ်တယ်။ လူကြီးပုံစံမျိုး၊ ဒရာမာ ပုံစံမျိုးဆိုရင် ညီမနဲ့ သိပ် မလိုက်ဖက်ဘူးလေ။ ဒီတော့ဇာတ်ကို အရင် ကြည့်တယ်။ ဖတ်တာပေါ့နော်။ ဇာတ်ကို ကြည့်ပြီး လက်ခံ ရိုက်ဖြစ်သွားမှာပါ”လို့ လည်းပြောပါတယ်။

ခင်ဝင့်ဝါ အနေနဲ့ အခုဆိုရင် ကြော်ငြာ ၇ခုနဲ့ ဇာတ်ကား ၇ကား ရိုက်ကူး ပြီးစီး သွားပြီဖြစ်သလို နောက်ထပ် လည်း ရွှေစင်ဦး၊ သစ္စာ နှင်းဆီ ဗီဒီယို ထုတ်လုပ်ရေးတွေ နဲ့ ဇာတ်ကား ရိုက်ကူးဖို့ ရှိတယ်လို့ သိရပါတယ်။ ၄လပိုင်း ပြင်ဦးလွင်မှာ ရွှေစင်ဦး နဲ့ ဇာတ်ကား ရိုက်ကူးဖို့ ရှိသလို အဲဒီက ပြန်လာရင်လည်း ဒါရိုက်တာ ကြည်ဖြူသျှင် နဲ့ဇာတ်ကား ရိုက်ကူးဖို့ ရှိတယ်လို့ ပြောပါတယ်။ ဒါ့အပြင် သင်္ကြန် အတွင်းမှာ ရိပ်သာဝင်ဖို့ စီစဉ်နေပေမယ့် တကယ်လို့ မဝင်ဖြစ်ရင် အိမ်မှာပဲ အေးအေးဆေး ဆေး နားမယ် လို့ ပြောပါတယ်။

Mဘွယ်/popularmyanmar

ဓာတ်ပုံ-အိသွဲ့(တန့်ယန်း)