စာရင်းကောက် ကောက်ယူသည့် သန်းခေါင်စာရင်းကို စာရင်းစစ်က စိစစ်ရပြီး မှားယွင်းမှုများ တွေ့ရှိပါက ပြန်ပြင်ခိုင်းမည် ဖြစ်ကြောင်း၊ သန်းခေါင်စာရင်းတွင် လူမျိုးသင်္ကေတ တစ်ခုတည်း ထည့်သွင်းခြင်း မဟုတ်ဘဲ သင်္ကေတဘေးတွင် လူမျိုးအမည်ကို စာဖြင့် ရေးသားထားသဖြင့် သင်္ကေတ မှားယွင်း ထည့်သွင်းလာပါက စာရင်းစစ်က စစ်ဆေး၍ ပြင်ဆင်မည် ဖြစ်ကြောင်း ပြည်သူ့အင်အား ဦးစီးဌာနမှ တာဝန်ရှိသူတစ်ဦးက ဆိုသည်။
“ဆရာမတွေ စာရင်းကောက်ကတည်းက ပြင်နေရပါတယ်။ စိတ်မပူပါနဲ့ စာရင်းကောက် ဆရာမအပြင် စာရင်းစစ် ဆရာမ ရှိပါသေးတယ်” ဟု ၎င်းကဆိုသည်။
လူမျိုးအမည်ကို ထားဝယ်ဟု ပြောဆိုခဲ့သော်လည်း ထားဝယ်တိုင်းရင်းသား သင်္ကတေ ၅၀၂ တွင် ထည့်သွင်းခြင်း မပြုဘဲ ဗမာသင်္ကတေ ဖြစ်သည့် ၅၀၁ ကို စာရင်းကောက်က မှားယွင်း ထည့်သွင်း ကောက်ယူသွားကြောင်း ရန်ကုန်ရောက် ထားဝယ်တိုင်းရင်းသူ တစ်ဦးက မတ်လ ၃၀ ရက်နေ့က အခြေအနေကို ပြောကြားသည်။
စမ်းချောင်းမြို့နယ်ရှိ အမျိုးသမီး ၁၂ ဦးနေထိုင်သည့် အဆောင်တွင် ဧပြီလ ၂ ရက်နေ့က သန်းခေါင်စာရင်း လာရောက်ကောက်ယူရာတွင် လူများသည်ဟု ဆိုကာ သက်ဆိုင်ရာ နေရပ်တွင် သွားရောက် သန်းခေါင်စာရင်း ကောက်ခံကြရန် စာရင်းကောက်က ပြောဆိုခဲ့ကြောင်း ကိုယ်တိုင်ကြုံတွေ့ရသူ မွန်တိုင်းရင်းသူ ဒေါ်ဝေဝေစိုးက ပြောဆိုသည်။
“စာရင်းကောက်က ရှိတဲ့လူ အကုန်လုံးကို ကောက်ရမှာ တာဝန်ရှိတယ် မဟုတ်လားလို့ ပြောတော့ ကျွန်မကို ဘုကြည့်ကြည့်တယ်” ဟု ၎င်းကဆိုသည်။
သန်းခေါင်စာရင်း လာကောက်စဉ် အမျိုးသမီး ၁၂ ဦးအနက် ၂ ဦးသာ အဆောင်တွင် ရှိနေသဖြင့် လူစုံသည့် အချိန်တွင် လာကောက်ရန် ပြောဆိုသော်လည်း စာရင်းကောက်က လက်မခံဘဲ ၁၂ ဦး အချက်အလက်များကို အဆောင်တွင် ရှိနေသည့် နှစ်ဦးကို မေးမြန်းကာ သန်းခေါင်စာရင်း ကောက်ယူသွားကြောင်း ဒေါ်ဝေဝေစိုးက ထပ်မံ ပြောကြားသည်။
“ဘွဲ့ရလား မရလား တစ်အိမ်တည်း နေပေမယ့် Data (အချက်အလက်) အကုန်လုံး ကျွန်မ ဘယ်ရမလဲ။ ကျွန်မတို့ မြို့က တစ်ယောက်ကိုပဲ ငါသိတယ်။ ကျန်တာတော့ မှန်းပြီးတော့ပဲ ထည့်လိုက်ရတာပေါ့” ဟု ၎င်းကဆိုသည်။
စာရင်းကောက်အချို့မှာ စိတ်မရှည်သည်ကို တွေ့ရပြီး မွေးဖွားရပ် အရပ်ဒေသတွင် လောင်းလုံးဟု ပြောဆိုရာ စာရင်းကောက် ရေးမြို့ သင်္ကတေကိုသာ အလျင်စလို မှားယွင်းစွာ ထည့်သွင်းတော့မည့် ဆဲဆဲအချိန်တွင် ပြန်လည် ပြင်ဆင်ပေးရန် စာရင်းကောက်ကို ပြောဆိုခဲ့ရကြောင်း ဧပြီလ ၂ ရက်နေ့တွင် ရန်ကုန်မြို့ ကမာရွတ်မြို့နယ်တွင် သန်းခေါင်စာရင်း အကောက်ခံရသူ တစ်ဦးက ဆိုသည်။
ရန်ကုန်မြို့တော်ကဲ့သို့ တိုင်းရင်းသားနှင့် အခြားလူမျိုး၊ ဘာသာပေါင်းစုံ ရှိသည့် ရောယှက်နေထိုင်နေသည့် နေရာမျိုးတွင် စာရင်းကောက်များ စိတ်ရှည်စွာ သေသေချာချာ ကောက်ယူနိုင်မှသာ အချက်အလက် အမှန်အကန် ရရှိနိုင်မည် ဖြစ်ကြောင်း သန်းခေါင်စာရင်း အကောက်ခံခဲ့ရသူများက သုံးသပ်ကြသည်။
စာရင်းကောက် ဆရာမများကို သန်းခေါင်စာရင်း ကောက်ယူရာတွင် အချက်အလက် မှန်မှန်ကန်ကန် ရရှိစေရန် စာတွေ့နှင့်လက်တွေ့ သင်ကြားကာ သေသေချာချာ လေ့ကျင်ပေးထားကြောင်း ပြည်သူ့အင်အား ဦးစီးဌာနမှ ညွှန်ကြားရေးမှူးချုပ် ဦးမြင့်ကြိုင်က ပြောဆိုသည်။
နှစ်ပေါင်း ၃၀ ကျော်တွင် ပထမဆုံး အကြိမ်အဖြစ် မြန်မာနိုင်ငံတွင် ပြည်လုံးကျွတ် သန်းခေါင်စာရင်းကို မတ်လ ၃၀ ရက်နေ့မှ ဧပြီလ ၁၀ ရက်နေ့အထိ ကောက်ယူမည် ဖြစ်သည်။
ဧပြီလ ၁၀ ရက်နေ့ နောက်ဆုံးနေ့အထိ သန်းခေါင်စာရင်း လာရောက် ကောက်ယူခြင်း မရှိခြင်း၊ သန်းခေါင်စာရင်း ကောက်ယူပြီးစီးကြောင်း သင်္ကတေ ကတ်ပြား ကတ်ထားခြင်း မရှိပါက ရပ်ကွက် ကျေးရွာအုပ်စု သန်းခေါင်စာရင်းရုံးသို့ သတင်းပို့ရန် လိုအပ်ပြီး ယင်းသို့ ကျန်ရှိခဲ့သော နေအိမ်များတွင် ပြန်လည်ကောက်ယူမည် ဖြစ်ကြောင်း ပြည်သူ့အင်အား ဦးစီးဌာနက သတင်း ထုတ်ပြန်ထားသည်။
သန်းခေါင်စာရင်းနှင့် ပတ်သက်၍ မေးမြန်းနိုင်သော အရေးပေါ် ဖုန်းနံပါတ်မှာ ၁၈၄၀ ဖြစ်သည်။
The Voice Weekly
No comments:
Post a Comment