"လမ်းဖောက်လုပ်တဲ့ နေရာက ရှေးဟောင်းဘုရားတွေ ရှိခဲ့တဲ့နေရာမှာ ဖြစ်နေတော့ ဘုရားဌာပနာ သွင်းခဲ့တဲ့ ဆင်းတုတွေ ပြန်တွေ့တာပါ၊ အားလုံးပေါင်း ၃၀ လောက်တွေ့ရပါတယ်" ဟု ဒေသခံ တစ်ဦးက ဖေဖော်ဝါရီလ ၁၇ ရက်နေ့က ပြောပြသည်။
လောင်းရှည်ကျေးရွာ၊ မြို့မရပ်ကွက်၊ ယွန်းကျောင်းတိုက်အနီးရှိ ဗူးလမ်းဆုံနှင့် လောင်းရှည်လမ်းပိုင်းရှိ လောင်းရှည်-စေတုတ္တရာနှင့် လောင်းရှည်-ကျင်ဒွေးလမ်း တို့၏ လမ်းဆုံ ဖောက်လုပ်ဆဲ မြေတူးဖော်ရာတွင် တွေ့ရှိခဲ့ခြင်းဖြစ်ကြောင်း
အဆိုပါ ဆင်းတု ရုပ်ပွားတော်များမှာ ဉာဏ်တော်အမြင့် နှစ်လက်မဝန်းကျင်ခန့် ရှိကာ ယွန်းကျောင်းတိုက်တွင် အပူဇော်ခံ ထားရှိမည်ဖြစ်ကြောင်း ယင်းကျောင်းတိုက်မှ ဆရာတော်က မိန့်ကြားသည်။
လောင်းရှည်ကျေးရွာသည် ရှေးဟောင်း ယောဒေသတွင် ပါဝင်သော ကျေးရွာတစ်ခု ဖြစ်ပြီး နှစ်ပေါင်း ၁၀၀ ကျော် သက်တမ်းရှိ ယွန်းကျောင်းတိုက် အပါအဝင် နှီးဘုရား၊ ယွန်းဘုရား၊ ရှေးဟောင်းပေစာ၊ သီရိဓမ္မာသောက မင်းကြီး တည်ထားသော သိန်းကျင်း ရွှေတန်ဆာဘုရား စသော လေ့လာဖွယ်ရာ နေရာများတည်ရှိပြီး အိမ်ခြေ ၆၅၅ လုံး၊ အိမ်ထောင်စု ၅၆၀ စု၊ လူဦးရေ ၂၈၈၆ ဦး နေထိုင်ကြောင်း ဒေသခံများထံမှ သိရှိရသည်။
No comments:
Post a Comment